Como transplantar paso a paso
As plantas que crecen en macetas, necesitan ser transplantadas periodicamente para ter máis espazo e desenvolverse correctamente. Chegou o momento de facelo coas túas e non sabes por onde empezar? Contámosche como paso a paso.
As plantas para que crezan adecuadamente, ademais dos coidados habituais como a rega, necesitan ter o espazo suficiente. Por iso, se queres que estean sas e bonitas, é moi importante prestar atención ao seu crecemento e transplantalas de maceta cando o requiran. O mellor momento para facelo é a primavera, xa que, debido ao aumento das horas de sol, crecen de forma máis rápida. Toma nota!
Paso 1. Revitaliza a túa planta
Non será necesario en todas as plantas, pero naquelas que teñan moitas follas tras o longo inverno, failles un corte revitalizador antes de transplantalas. Como? Corta só as poliñas en expansión ou as que estean mortas.
Antes de tiralas… le o seguinte paso!
Paso 2. Dá unha segunda vida ao que cortes
En vez de tirar todas as follas ou ramas que recortes das túas plantas, suxerímosche que gardes as máis bonitas e as coloques nun vaso de cristal con auga. Desta forma podes crear unha peza decorativa que leve a natureza a calquera parte da casa.
Se algunha folla xa estaba morta e ten peor aspecto, podes aproveitala para enmarcala e facer un cadro.
Paso 3. Elixe a nova maceta e prepara o substrato
Unha vez retiradas as follas sobrantes da túa planta (se é que o necesitaba), chega o momento de elixir a nova maceta na que a colocarás. Esta deberá ser entre 5 e 10 cm de diámetro maior que a anterior, en función do tamaño cada planta, para que así teña máis espazo.
Existen macetas de moitos materiais ( terracota, PVC, barro, madeira…), o ideal é que elixas a túa tendo en conta as necesidades da túa planta e o lugar no que vas colocala. Se vas poñela na terraza ou o xardín necesitarás que o material sexa máis resistente que se se trata dunha planta de interior, xa que estarán expostas á choiva ou a cambios de temperatura bruscos.
Cando teñas escollida a maceta, chega o momento de engadir uns cantos centímetros de substrato no fondo da nova maceta. Un truco? Se tes un testo vello de terracota que estea roto, podes esmagalo e mesturalo coa terra para mellorar a drenaxe e que as plantas crezan aínda máis.
Paso 4. Procede ao transplante
Sacar a planta do seu testo actual é o paso máis complicado. Para facelo correctamente, debes retirala con moito coidado e evitar que se danen as raíces. Tras isto, colócaa sobre a base de substrato do novo testo e enche os laterais sen esmagar en exceso.
A altura á que estea colocada a planta ten que ser similar ou algo superior á que tiña na maceta anterior.
Paso 5. Régaa e colócaa onde queiras
O último paso será regala na medida xusta, sen inundala, para que siga crecendo comodamente no seu novo espazo.
