3 ideas de decoración con flores secas para este outono

Queres darlle ao teu fogar un toque outonal? Anota estas 3 sinxelas propostas para decorar con flores secas.

Co cambio de estación, a natureza muda a súa paleta de tons verdes e cores vivas polos laranxas, avermellados e marróns, dando así a benvida ao outono. Na casa, ese espazo no que este ano estamos a pasar tanto tempo, tamén podemos acompañar esta transición estacional a través da decoración con materiais naturais e dunha forma moi económica. Queres ver como? Preparamos 3 ideas para que poidas decorar de forma práctica, barata e bonita con plantas e flores secas. É moi entretido! O mellor é que, ademais de crear un ambiente moi acolledor e agradable, non terás que preocuparte por regar! Toma nota destes pasos.

Vasos, a opción máis fácil e rápida

Para esta primeira idea, o primeiro que debes facer é colleitar aquelas plantas que che gusten e inspiren para crear a túa composición. Así que, aproveita para dar un paseo reconfortante polo campo se tes a sorte de poder facelo.

Non teñas medo a combinar!

Podes conformarte cun só recipiente, pero recomendámosche que xogues e vaias un paso máis aló. Agrupa unha selección de flores en vasos de diferentes alturas e formas, para facer un bodegón visualmente rechamante. É só cuestión de probar. Tamén podes darlle unha segunda vida ás botellas de vidro e xerras que teñas por casa.

Se non che convence a altura que elixiches, curta con axuda dunhas tesoiras os talos para ir regulando a colocación. Non te esquezas de poñer un pouco de terra ou unha esponxa para flores naqueles vasos máis anchos e que non son transparentes, para que todo se suxeite ben e non se mova.

A túa propia coroa de piñeiro

Outra das ideas que temos preparadas é a creación dunha coroa. Que che parece? Dependendo de como a decoremos, podemos utilizala tanto para a decoración diaria da estancia, como para unha época especial, como o Nadal.

Todo o que necesitas para facer esta coroa de inverno é comezar cun aro artesanal e algunhas pugas ou talos de tempada, como poliñas de piñeiro e outras árbores de bosque.

Enlaza os recortes con fío de coser e enrólao ao redor do aro para aseguralos e que queden ben suxeitos. Deixa que os anacos sobresaian de forma natural para unha aparencia salvaxe e imperfecta. E xa está!

Se queres darlle un toque moi orixinal e festivo, aconsellámosche pintar algunhas das follas ou ramas con aerosol de cor dourada ou prateada e mesmo pulverizar algunhas con escuma branca para darlle un efecto de neve.

Unha grilanda de folla perenne

Esta última opción permitirache vestir un maior tramo de parede dunha forma moi sinxela. Tan só necesitas os materiais naturais que queiras, tesoiras e fío negro. Agrupa en pequenos ramalletes as follas ou poliñas e enrola o extremo con fío. Sen cortar o nó, segue enlazando as plantas deixando unha pequena separación entre unhas e outras. Combina ramas frescas con outras máis secas para conseguir un efecto invernal, pero á vez colorido. A extensión é totalmente libre, así que adáptaa ao teu gusto e espazo. Verás que sinxelo é!