Hortos Urbanos: un ano promovendo a educación ambiental e a vida saudable
O programa Hortos Urbanos, promovido pola Deputación de Lugo e desenvolvido por Dixardín, vén de completar un ano de actividade cun notable éxito de participación. Dende o seu inicio en outubro de 2023, preto de 300 persoas tomaron parte nos 35 obradoiros organizados, consolidando esta iniciativa como un referente en educación ambiental e fomento da vida saudable.
Os Hortos Urbanos ofrecen un espazo ao aire libre que promove o contacto coa natureza e a aprendizaxe práctica sobre técnicas de cultivo sostible. A través dos obradoiros, a cidadanía tivo a oportunidade de achegarse ao mundo da horticultura e adquirir coñecementos sobre tarefas esenciais como o mantemento dos hortos, o control de pragas e enfermidades ou a obtención de sementes para garantir colleitas futuras.
Ademais do seu impacto formativo, esta iniciativa fomenta a participación cidadá e o compromiso co medio ambiente, promovendo prácticas responsables e sostibles que contribúen á mellora da calidade de vida e ao desenvolvemento dun modelo urbano máis verde.
