O Concello de Carballo volve confiar en Dixardín para o mantemento dos espazos verdes públicos
O Concello de Carballo e Dixardín asinaron novo contrato para o mantemento, conservación e mellora de espazos verdes municipais e arborado para os vindeiros catro anos. Este acordo, que ascende a 433.964,30 euros anuais, reflicte a aposta municipal pola inserción laboral das persoas con discapacidade.
A sinatura do contrato contou coa presenza do alcalde, Evencio Ferreiro, do concelleiro de Medio Ambiente e Servizos, Miguel Vales, e po parte de COGAMI Empresarial estiveron presentes o presidente, Anxo Queiruga, o vicepresidente, Ramón Sestayo, o conselleiro delegado de Galega de Economía Social, Víctor Silva, e o xerente de Dixardín, Carlos Iglesias.
Dixardín asumiu por vez primeira o mantemento dos espazos verdes municipais o ano 2019. A notable mellora experimentada nestas zonas, o favorecemento do emprego inclusivo e o compromiso municipal na reserva de servizos a centros especiais de emprego de iniciativa social favoreceron que o Concello, de Carballo volvera confiar na iniciativa Dixardín.
Un equipo de 10 profesionais asumirán a conservación e mantemento de parques urbanos, zonas axardinadas, arborado viario, xardineiras, estruturas florais e espazos verdes de centros educativos e edificios municipais. O contrato abrangue un total de 186.495 metros cadrados de zonas verdes distribuídas en 137 espazos das 18 parroquias do concello.
